Matthew 22

Shekwoyi Bemi Dogbe

1– 2Yesu ɓo da anabari n mwa begye ntu ge wa wu ngye shi Shekwoyi ʼBemi wu. Wa gna, “Aɓa mwi ko do n ʼsu ho yi n wo ɓo zhin amula wyefan shiri dnagmai ntu wo nugun ɓo. 3Wa ku awyefan ɓo pa aza mwa, She shiri ɓo ku zo zhin, wa tnu ge aza ɓa ɓe gye sa la si, ama oɓa vinya, to ɓa ɓe m. 4Wa je aza do tnu ge agna ɓa ge, ‘Aku shiri zo zhin, aɓu ku ɓi. Ɓa ku pye!’

5“Ama aza n wo ɓo pa ɓa awyefan nyi, ɓa ma wo san ɓa gya-bye ɓa tnu-tnu yi, zaho wa lo wo nya wo fwa, zaho wa lo wo gniko. 6Azaho ɓa wan tnu-tnu da yi ɓa lu, ɓa dna ɓa vinyikwo har a kwa zaho wu.

7“Minagyi a gyi ʼsu yi wa tnu n wa sojayi, ɓa lo ɓa ku azayi wu nɓa ɓo wu waza nyi, ɓa ku ɓa ezhi kpe ʼna. 8Wa pmi wa gna wa fyenu ge, ‘Aku mula nyagyi zo shiri zhin, aza n mi ɓo pa ɓa nyi, ɓa to ɓo kunce ma pa ɓa m. 9Fye lo fye zan na zokwo, zaho-zahoi fya gye, fya gna wo wa ɓe.’

10“Afyenu ɓa lo ɓa yi aza ɓe cei, amanayi n na nukwoi yi mula nyagyi-ba nugni na zhiɓei yi. 11Ama she osu ɓo ɓe ge wa zhin azhiɓei mabe, wa gye zaho dna ntna mula je-kpe kpe yi (n na ɓo gawo nyi).

12“Wa nya ge, ‘Nugundo, ko zhin wuna hoi dna ʼya ntna mula je-kpe ya’? To zaya dna ɓegbe m.

13“Osu wa gna wa bmazhin-yi ge, ‘Fye la wo pa nabwa na pita yi fya she woya dna wyegma, aba n bwici lo ɓedo na nyikna gyi yi.’ 14Ntuge ayi-yihi mwa ɓegye lo, ama a kni-kniyi fyewyi nu.”

15Sai a Farisiyi a yezhi, ɓa zhin shaula shi ɓa ɓa zhin wa da ɓo ho n kwo ɓa zhin ɓa wan wo. 16Ɓa ku shaula zhin ge, ɓa tnu n ɓa zayi ɓedo na siyasa-da yi, ɓo nya wo ɓeye: “Zadnagmai, yi kpe lo ge ho da gaiciya ko ai ɓa tu ho ʼbe nu sha, ntna dna, to hoi kni-kni m. 17Yi ye ha gna yi, ko bmiya lo ya ga a Romayi Gamnati gadu kwo awo?”

18Ama Yesu wa ku kpe ɓo ye ɓa ye, “Wa gna ɓa, Efye aza-kwocednayi! Fye ye fya ze nyikanu mama n fya ɓenya a dabara nya yi a? 19Fye wu Mi gyiwye.” Ɓa ga wo kobo.

20Wa nya ɓa ge, “Nyikado foto nu tu ya? Nyikado ye yinu ka kpe n foto sinta?”

21Ɓa gna, “Kaisar nya.” Wa gna ɓa ge, “Fye ga Kaisar enya kwo zhin wo nya, fyaga Shekwoyi nyaho-nyahoi kwo zhin Shekwoyi nya.”

22Shi wo ɓo ga ɓa amsa lo nu ca wo ɓa, ɓa kuka ɓa lo ɓa nya.

23N wyiyi yi jesun, a Sadukiyi, aza nɓa gna kalaku to lo n vingwo n, ɓa ɓe Waba ɓa nya ge, 24“Zadnagmai, Musa ɓo gna nza fyi to woi ma aɓi m, owo zado ɓa mi wa la wo nyigbai, oɓa-ɓi ɓa ku zafifiyi gado.

25“N ya tasin, azaho ɓo nyi ngun tnaba nɓa ʼya mi. Eza kmisun-yi wa la nyikwo wa fi to ɓai ma ɓi m, owo mada la nyiko yi. 26Mado yi wa ka fice, ntna ɓi, owa ʼza-yatiyi wa kala har, oɓa tnaba, zaho-zahoi ɓami, wa nyikwo yi la. 27Nyiko yi ce, wa ɓe wa fi. 28N kalaku vingwo ma, wo ɓei zhin nyikado nyikwo na? Ntu ge oɓa tnaba, zaho-zahoi ɓo la wo la.”

29Ama Yesu wa gnaɓa ge, “Efya babwi pa ge fye ta kpe Littafi gyi-gyi yi ye lo n Shekwoyi iko yi m. 30Ntu ge n kalaku na vingwo, mula-pa to lo n, Zaho-zahoi ɓo la ze ngye amalaika n ʼshe. 31Ntu na zafyi kalaku ɓo, fye to shin Littafi Gyi-gyi-yi ba n? Fye ta kpe ge Shekwoyi ɓo daɓo n fyei nu Wa gna, 32‘Emi nu zhin Shekwoyi Ibrahim nya, Ishaku, n Yakubu n?’ Ntu cenu, Shekwoyi to zhin Shekwoyi aza fi-fiyi nya nu m, ama Shekwoyi aza wye-wyeyi da nya.”

33Ca wo aza yezhi na amsa yi n wo ɓo ga nyi. 34– 35Ama gbo na Farisiyi! She ɓa ɓo wo ge a Sadukiyi to gyi nasara n, ɓa zan ɓonya do shin ɓa nya Wo. Owa yekpei ho nɓa mi, wa daɓo wa gna, 36“Zadnagmai, kni wyidnai nu du vinya n Musa ʼwa?”

37Yesu wa gna, “ ‘Ye Dagayi oho Shekwoyi nho bugbai vinya, nho wye-wyei yi, nho ɓomwi yi.’ 38Deye nu zhin wyidna dnagmai kmisunyi. 39Odo nyi kwo yatu kwo, ‘Ye ho kunzhi-yi ngye shi ho ye hohin tukwo.’ 40Awyidnaje vinya, nna anabi ɓeda yi, ɓa kun nu awyidna gun-aba ye mi nu. Ɓa nu ɓami jesun, n ha shi ɓa bwa, ho ku aje shi bwa vinya nu.”

41Shi a Farisiyi ɓo ku she wo gun, wa nya ɓa ɓo. 42“Masifu ma, Nyika do nugun nu n woya”? Ɓa gna, “Dauda nugun.”

43Yesu wa nya ɓa ge, “Kniyi nu zhin Dauda woi daɓo dna n Zafun Gyi-gyi-yi iko woi yi wo ge Dagayiʼa?

44“Shekwoyi ɓo gna mi Dagayi ge, ‘La sase mi bwaizhe-bwa har ma ku ha nuwunyi fi nha pita sinta.’ 45Shi Dauda ɓo yi wo ge Dagayi nyi, ko ɓa ze wuna agna ge wo zhin wo nugun na?”

46To ɓa bwa ɓegbe-dna m. Ntu wyi yi yi, to zaho-zaho yi wa jemi wo ɓo nya m.